Россиялик врач аслида наркотик савдоси билан шуғулланаркан…

Яқинда Россиянинг Кемерово шаҳридаги касалхоналардан бирида 31ёшли жарроҳ қўлга олинди. Маълум бўлишича, у наркотиклар савдоси билан шуғулланаркан. Жарроҳнинг уйи тинтув қилинганда, полициячилар таркибида наркотиги бор, аммо номи қайд этилмаган беш грамм дори воситаси, 1, 5 грамм экстази, икки грамм гашиш ва 0, 5 грамм амфетамин топишди. Жарроҳ ҳақиқатан уйида наркотик моддалар сақлаганлигини тан олди. Аммо уларни ўзи учун олиб қўйганини айтиб терговчиларни чалғитишга уринди. Лекин ёлғони ўтмади. Терговчилар айнан у наркотик моддалар савдоси билан шуғулланишини аниқлашди.

Ушбу факт юзасидан жиноий иш қўзғатилди. Тергов ҳаракатлари бошланган.

Дарвоқе, шу йил апрел ойида Барнаулда истиқомат қилувчи врач-нарколог ва унинг қўлида даволанган эркак биргаликда наркотик савдоси билан шуғулланиб келгани маълум бўлган. Улар банкдан олган кредитни ёпиш, ижарадаги квартира ҳақини тўлаш ниятида шундай ишга қўл уришган экан.