Абдуқодир Ҳусанов феномени: Гвардиола ишончи ва АПЛдаги ўсиш

SQUAWKA.com Англия Премьер-лигасидаги ягона футболчимиз Абдуқодир Ҳусанов ҳақида таҳлилий материал эълон қилди. Мақолада у Англияга келган илк кунларидан тортиб, бугунги даражагача қандай қийин йўл босиб ўтгани, нима сабабдан “ўзини топиб олгани” ва айнан қайси жиҳатлари билан “Манчестер Сити” учун қимматга айланаётгани кенг ёритилган.

Материал биринчи жумладаноқ “Сити” мухлисларини бир фикрга чорлайди: жамоада Ҳусановдек ҳимоячи борлигидан хурсанд бўлиш керак. Лекин бу хурсандчилик ортида осон сценарий йўқ. Ёш футболчи учун янги мамлакат, янги шаҳар, янги муҳит — барчаси бир вақтда бошланган катта синов эди.

Дебютдаги хатодан кейинги босим

Ҳусановнинг Англиядаги старт нуқтаси ҳам “йўл тегиз” эмасди. “Челси”га қарши илк учрашувдаги хато голга сабаб бўлди. Ўйин 3:1 ҳисобида “Сити” фойдасига якунланган бўлса-да, кўпчиликнинг хотирасида айнан ўша эпизод қолди. Вақт ўтди, ойлар ўтди — Абдуқодир тезда руҳий жиҳатдан ўзини тиклаб, мухлислар ишончини қайтаришга киришди. Одамлар хатони унутиб юбориши мумкин, аммо футболчи учун ўша ҳис-туйғу ва ички босимдан чиқиш осон бўлмайди. Шу нуқтада энг катта ролни Пеп Гвардиола ўйнагани таъкидланади.

Мураббий ёш ҳимоячини босимдан олиб чиқиш учун аниқ стратегия танлади: Абдуқодирни кетма-кет олтита ўйинда асосий таркибда майдонга тушириб, унга ишончини амалий тарзда кўрсатди. Муаллифлар қайдича, Гвардиола ёш легионерга Англиядаги янги ҳаёт қанчалик оғир кечишини яхши англаган. Бундан ташқари, Ҳусанов инглиз тилида эркин гапира олмасди — бу ҳам адаптацияни секинлаштирадиган омил. Бироқ “Сити” штаби ва мураббийлик ёндашуви футболчини “ўзига келиш” жараёнида қўллаб-қувватлаб борган.

Чуқурликдан чиқиш: имконият эшиги очилди

Бир пайтлар вазият шундай кўриндики, Ҳусанов гўё четда қолган, жамоа ўйинида “эсдан чиққан” футболчига айланиб қолгандек эди. Чунки ҳимоя чизиғида рақобат қаттиқ: Матеус Нуньес ўнг қанотда барқарор, марказда Рубен Диаш, Йошко Гвардиол ва Жон Стоунс — мустаҳкам таянчлар. “Челси”га қарши ўша салбий эпизод ҳам Абдуқодирнинг руҳиятига қаттиқ ўтирган.

Лекин футболда “вақт” ҳам, “вазият” ҳам тез ўзгаради. Диаш ва Гвардиолнинг жароҳат олиши Ҳусанов учун янги имконият эшигини очди. Муаллифлар фикрича, агар ўша жароҳатлар бўлмаганида, ёш ҳимоячи учун янги йил қисми анча сокин ва ҳатто зерикарли ҳам ўтиб кетиши мумкин эди. Аммо айнан шу вазият Ҳусановнинг қайтиши учун катта шанс бўлди: у “қоронғи ўра”дан чиқиб, яна асосий таркибга яқинлаша бошлади.

“Брайтон”, “Эксетер”, “Ньюкасл”: ишончни қайтарган уч ўйин

Тез орада Абдуқодир “Брайтон”, “Эксетер” ва “Ньюкасл”га қарши ўйинларни бошланғич таркибда ўтказди. Жамоада 20 ёшли Макс Аллейнни ҳисобга олмаганда, “Сити” ҳимоя линиясида ёшлар кўп эмас — шу маънода Ҳусанов ўзини катта ишонч билан тута олгани алоҳида қайд этилади.

“Эксетер”га қарши 10:1 ҳисобидаги йирик ғалабада у эркин ҳаракат қилди, ҳимояда ҳам, позицион ўйинда ҳам ишончли кўринди. “Брайтон”га қарши беллашув ҳам юқори савияда ўтди. “Ньюкасл” устидан 2:0 ҳисобидаги ғалабада эса Ҳусанов “Сент Жеймс Парк” каби оғир стадионда мураккаб вазифани уддалаган жамоанинг муҳим бўғини сифатида кўрсатилди.

“Ньюкасл”ни тийиб қўйган ҳимоядаги деталлар

Таҳлил қисмида “Ньюкасл”га қарши ўйинда Ҳусановнинг ҳаракатлари рақамлар билан очиб берилган. ВАРнинг узоқ ишлагани ҳам эсга олинади, аммо энг асосийси — “Ньюкасл” ҳужумда одатда уйда ўртача 6та зарба йўллайди, бу ўйинда эса рақиб дарвозаси томон атиги икки марта зарба бера олган. Муаллифлар бунга “Сити” ҳимояси йўл қўймаганини таъкидлайди.

Ҳусановнинг шахсий статистикаси эса шу ерда “пичоқдек” очилади:

• 6 марта тўпни тоза олиб қўйиш;

• 4 марта подкат орқали тўпни эгаллаш;

• 1 марта 100 фоизли подкат билан хавфни бартараф этиш.

Англияда подкат маданиятига талаб қаттиқ — шунинг учун бу рақамлар алоҳида қадрланади. Таҳлилда келтирилишича, АПЛда рўйхатдан ўтган 303 футболчи орасида подкатни самарали бажариш бўйича Ҳусанов 91,7 фоиз натижа билан 2025/26 мавсумида 5-ўринда турибди. Солиштириш учун Гвардиол 94,7 фоиз билан 4-ўринда.

Тўп узатишларда ҳам “плюс”: ўйин қуришга ҳисса

Ҳимоячи учун фақат бузиш эмас, тўп билан ўйнаш ҳам муҳим. “Ньюкасл”га қарши баҳсда энг кўп пас берган футболчи ҳам Ҳусанов бўлган: 58 марта тўп узатган. Энг муҳими, узатмаларнинг 93,5 фоизи мўлжалга етган. Бу кўрсаткич ёш ҳимоячининг позицион ўйинда жамоага “қурилиш материали” бўла олишини англатади.

Гвардиоланинг баҳоcи ва кейинги имтиҳон

Мақолада Пеп Гвардиоланинг Ҳусанов ҳақидаги фикри ҳам келтирилади: у бу трансферни жамоа учун ўта муҳим деб атаган, “Сити” юқорида ўйнагани учун орқада ишончли ҳимоя шартлигини айтган. Мураббийнинг таъкидича, вақт ўтиши билан Ҳусановнинг фойдаси янада ортиб боради, чунки у ҳали ёш ва ўрганадиган жиҳатлари кўп. Энг асосийси — Абдуқодир машғулотларда 100 фоиз куч билан ишлайди.

Таҳлилнинг якуний қисмида эса навбатдаги синов — Манчестер дербисига урғу берилади. “Юнайтед” аввалгидек эмас, лекин мураббий алмашган, жамоа янги қўл остида қандай ўйнашини олдиндан айтиш қийин. Демак, бу ўйин Ҳусанов учун ҳам янги топишмоқ: “Сити” “Арсенал”га босимни сақлаб қолиш учун ғалаба излайди, Абдуқодир эса шу босим остида яна бир бор ўз даражасини исботлаши керак бўлади.

Қисқаси, Ҳусанов ҳақидаги бу таҳлил бир нарсани айтаяпти: дебютдаги бир эпизод футболчини “битта хато”га айлантириб қўймайди. Тўғри бошқарув, ишонч ва меҳнат бўлса — ўша хато кейинчалик катта ўсиш нуқтасига айланиб кетади.