Арбелоа Моуриню бошқараётган «Бенфика» билан ўйинни кутмоқда

Мадриднинг «Реал» клуби бош мураббийи Алваро Арбелоа Европа Чемпионлар лигасида «Бенфика»га қарши бўладиган баҳс олдидан ўз фикрлари билан ўртоқлашди. Бу ҳақда euro-football.ru хабар беради.

Учрашув Лиссабонда умумий босқичнинг сўнгги тури доирасида 28-январ, чоршанба куни бўлиб ўтади. «Бургутлар»ни ҳозирда Жозе Моуриню бошқармоқда — уни яқинда «Реал»га эҳтимолий қайтиш билан ҳам боғлашганди.

«Бизнинг мақсад — кучли саккизликдан жой олиш. «Бенфика» стадиони биз, мадридистлар учун ҳар доим алоҳида аҳамиятга эга бўлиб қолади», — дея Арбелоанинг сўзларини келтиради Madrid Xtra.

Эслатиб ўтамиз, 2014-йил май ойида Лиссабондаги «Эштадиу да Луш» аренасида «Реал» Чемпионлар лигасини ўнинчи бор қўлга киритганди: финалда «Атлетико» 4:1 ҳисобида мағлуб этилган. Ўша пайтда «Реал» ҳимоячиси бўлган Арбелоа эса финални заҳирада ўтказган.