Пато Англиядаги «Колчестер» клубини сотиб олиши мумкин
«Милан»нинг собиқ бразилиялик ҳужумчиси Александр Пато яқин орада фаол футболга қайтиши мумкин, бироқ бу сафар майдонда эмас. У Англиянинг «Колчестер» клуби акцияларининг назорат пакетини сотиб олиш бўйича музокаралар олиб бормоқда. Бу ҳақда euro-football.ru хабар беради.
«Колчестер» ҳозирда League Two — Англия футболдаги кучи бўйича тўртинчи дивизионда иштирок этади. Клуб раҳбарияти бразилиялик билан музокаралар кетаётганини тасдиқлади, Патонинг ўзи ҳам сўнгги пайтларда жамоа учрашувларида тез-тез кўринмоқда.
Данни Коули бошчилигидаги жамоа ҳозир яхши паллани бошдан кечирмоқда ва League One'га чиқиш учун курашмоқда. Пато каби машҳур ва харизматик шахснинг келиши клубга медиа жиҳатдан кучли туртки бериши мумкин.