«Реал» Эндрик бўйича келажакка доир қарорини белгилади

Мадриднинг «Реал» клубига тегишли ҳужумчи Эндрик ҳозирда ижара асосида «Лион» сафида ёрқин ўйин кўрсатмоқда. Бу ҳақда euro-football.ru хабар беради.

19 ёшли футболчи француз жамоасидаги дастлабки уч учрашувда 4 та гол уриб, яна 1 та ассист қайд этди. Лига 1 доирасида «Мец»га қарши сўнгги баҳсда бразилиялик ҳужумчи хет-трик ҳам расмийлаштирди.

Журналист Фабритсио Романонинг маълумотига кўра, «Реал»нинг позицияси аниқ: клуб Эндрикни ўз режаларида ушлаб турибди ва қайтганидан кейин Мадридда ўзини кўрсатиш учун имконият беради. «Лион» ижара муддатини узайтиришга уриниши мумкин, бироқ «қироллик клуби» раҳбарияти истеъдодли форвардни жамоага қайтаришни режалаштирмоқда.

Эндрикнинг Испания гранди билан шартномаси 2030 йил ўрталаргача амал қилади.