Денис Макаров Туркияга қандай кетгани ҳақида гапирди

Ҳужум қаноти футболчиси Денис Макаров Туркиянинг “Кайсериспор” клубига ўтиши қандай кечганини айтиб берди. Бу ҳақда euro-football.ru хабар беради.

27 ёшли футболчининг сўзларига кўра, у қишки йиғинлар бошланишидан олдинроқ ҳам яқин орада бошқа жойга кетишини сезиб, буюмларини йиғиштириб қўйган.

“Йиғинга келдим, орадан икки кун ўтди, агентим Алексей қўнғироқ қилиб: ‘Туркиядан вариант бор. Хоҳлайсанми?’ деди. Мен дарров рози бўлдим — янги чемпионат, янги ҳис-туйғулар”, — дея Макаровнинг сўзларини “Чемпионат” нашри келтиради.

Унинг таъкидлашича, “Кайсериспор” мураббийи ва спорт директор билан бўлиб ўтган суҳбатдан сўнг томонлар ҳамкорлик бўйича тезда ўзаро келишувга келган.

Аввал “Динамо” сафида тўп сурган Макаров турк клуби билан ярим йиллик шартнома имзолаган. Келишувда уни узайтириш опцияси кўзда тутилмаган.