Клозе Месси ва Мбаппе унинг рекордини янгилашига ишонмоқда
Германия терма жамоасининг собиқ ҳужумчиси Мирослав Клозе жаҳон чемпионатлари тарихидаги энг сермаҳсул футболчи сифатидаги рекорди узоқ ушланиб қолмаслигини айтди. Бу ҳақда euro-football.ru хабар беради.
Клозе тўртта мундиалда майдонга тушиб, жами 16 та гол урган. Ҳозир фаол футболчилар орасида унга энг яқин кўрсаткич Лионел Месси (13 гол) ва Килиан Мбаппе (12 гол) ҳисобига тўғри келади.
«Менинг жаҳон чемпионатидаги голлар рекордим тез орада янгиланади. Буни 2026 йилда Месси амалга ошириши мумкин, ёки Мбаппе 2026 ёхуд 2030 йилларда. Мен Леони жуда ёқтираман ва агар у фаолиятини давом эттирса, энг яхшисини тилайман. Мбаппенинг ҳам истеъдоди ақлбовар қилмас даражада. Умид қиламанки, иккаласи ҳам соғлом бўлади ва максимум даражасини кўрсатади. Барибир, ҳозирча энг яхши статистика менда ва ярим финалда тўрт марта ўйнаган ягона футболчиман», — дея Клозенинг сўзларини келтиради Bild.
Эслатиб ўтамиз, Месси 2022 йил Қатар мундиалида чемпион бўлган, Мбаппе 2018 йилда Россияда кубокни қўлга киритган, Клозе эса 2014 йил Бразилияда Германия билан бирга ғолибликни нишонлаган.