2029 йилги қишки Осиё ўйинлари расман Олмаотага кўчирилди

Фото Tengrinews.kz/Алихан Сариев

2 февраль куни Осиё Олимпия кенгаши Осиё Олимпия кенгаши 2029 йилги қишки Осиё ўйинлари Олмаота шаҳрида ўтказилишини расман маълум қилди. Бу ҳақда Синхуа агентлиги хабар берган.

Дастлаб мусобақа Саудия Арабистонида ташкил этилиши режалаштирилган, ҳатто қишки спортлар учун келажакда барпо этиладиган Трожена лойиҳаси асосий майдон сифатида тилга олинган эди. Аммо янги шаҳар ва иншоотларни қуришга кўпроқ вақт керак бўлиши маълум бўлиб, ўтган ой ўйинлар номаълум муддатга қолдирилгани эълон қилинган.

Шу нуқтада Олмаота варианти амалда энг мантиқий йўл бўлиб чиқди: шаҳар қишки спорт муҳитига тайёр, тажриба бор, инфратузилма деган нарса ҳам “қоғозда эмас, ерда” турибди. Зеро, Қозоғистон 2011 йилда VII қишки Осиё ўйинларига мезбонлик қилган — мусобақалар Астана ва Олмаотада, шунингдек атроф ҳудудларда бўлиб ўтган.

Қисқаси, 2029 йилги қишки Осиё ўйинлари учун “тайёр майдон” танланди. Энди энг муҳими — тайёргарликни тўғри йўлга қўйиш: логистика, хавфсизлик, арена ва мухлислар сервислари. Агар шу ишлар пухта қилинса, Олмаота бу мусобақани яна бир бор юқори савияда ўтказиб, минтақа қишки спортига янги суръат бериши мумкин.