Александр Глеб «Арсенал»нинг Чемпионлар лигасидаги имконини баҳолади

«Арсенал»нинг собиқ футболчиси, беларуслик Александр Глеб лондонликларнинг жорий Чемпионлар лигаси мавсумида бош совринга даъвогарлиги ҳақида фикр билдирди. Бу ҳақда euro-football.ru хабар беради.

Глебнинг айтишича, «канонирлар» турнирнинг умумий босқичини жуда юқори савияда ўтказди. Бироқ у ҳозирча мусобақада яққол битта фаворитни ажратиб кўрсатиш қийинлигини таъкидлади.

«Барча 1/8 финал иштирокчилари аниқ бўлгач, манзара равшанлашади. Лекин, албатта, собиқ клубим Чемпионлар лигасини ютса ёки ҳеч бўлмаганда финалгача етиб борса, хурсанд бўламан», — деди Глеб.

Шунингдек, у финалда ҳимояга ёпилиб оладиган жамоалар эмас, ҳужумкор футбол кўрсатадиган икки жамоани кўришни исташини қўшимча қилди.

Маълумот учун, «Арсенал» Чемпионлар лигасининг умумий босқичини 1-ўринда якунлаб, саккиз учрашувнинг барчасида ғалаба қозонди. Янги форматда бундай натижага биринчи бўлиб эришган жамоа ҳам айнан «канонирлар» бўлди.