ТОЧ Россия бўйича юмшаш FIFA ва UEFAGA ҳам таъсир қилади
Футбол эксперти Александр Точилин «Евро-Футбол.Ru»га берган эксклюзив интервьюсида FIFA президенти Жанни Инфантино Россия жамоаларига қўйилган тақиқни бекор қилиш тарафдори экани ва Халқаро Олимпия Қўмитаси (ХОҚ) яқин орада Россия спортига қўйилган барча санкцияларни олиб ташлаши мумкинлиги ҳақидаги хабарларни изоҳлади. Бу ҳақда euro-football.ru хабар беради.
Точилин жаҳон ОАВларида ХОҚнинг Миландаги йиғилишида Россия спортига нисбатан чекловларни бекор қилиш бўйича принципиал қарор қабул қилингани айтилаётгани юзасидан: «Бунга ишонишни ҳам, шундай бўлишини ҳам хоҳлайман. Бундай гаплар анчадан бери юрибди. Европадан изоляцияни бекор қиладиган аниқ сиёсий қарор керак. Улар ҳам Россиясиз йирик мусобақаларда интрига ва оммабоплик пасайишини тушунади. Сўз амалда ҳам тасдиқланса, жуда яхши», деди.
Инфантино Россия терма жамоалари ва клубларини четлатиш «маънсиз» экани ҳақида гапиргани ҳам Точилиннинг эътиборидан четда қолмади. Унинг фикрича, бу баёнот дунёда вазият ўзгариб бораётганини кўрсатади: «Россияга нисбатан икки хил стандарт ва бирёқлама ёндашувни кўряпмиз. Лекин вақт бир жойда турмайди, ўзгаришлар бўляпти. Улар ўзлари ҳам бундай бан — мантиқсиз ҳолат эканини англаяпти», деди у.
Мутахассис ХОҚ санкцияларни бекор қилса, бу футбол ташкилотларига ҳам таъсир қилиши мумкинлигини таъкидлади. «Бу занжирли реакция бўлади: бошқа ташкилотлар ҳам қарорларини қайта кўриб чиқади. Энг муҳими — ким биринчи қадам ташлайди. ХОҚдек йирик тузилма шундай қарор қабул қилса, прецедент пайдо бўлади ва кичикроқ ташкилотлар ҳам ортидан эргашади», — деди Точилин.
Инфантино келажакда сиёсий сабаблар билан жамоаларни мусобақалардан четлатишни қонуний жиҳатдан тақиқлаш кераклигини айтгани борасида ҳам у қўллаб-қувватлашини билдирди: «Спортнинг бош шиори — у сиёсатдан холи бўлиши керак. Россияга нисбатан қабул қилинган қарорлар эса айнан шу тамойилга зид чиқяпти», дея фикр билдирди.
Шунингдек, ОАВ FIFA апрел ойидаги навбатдаги конгрессда Россиянинг халқаро турнирларга тўлиқ қайтиши масаласини муҳокама қилиши мумкинлигини ёзаётгани ҳам эслатилди. Точилин бундай муддатларда қайтиш эҳтимолини инкор этмади: «Агар бундай гап кетаётган бўлса, демак, имконият бор. Бу маълумотлар ҳаводан олинмайди, энди ижобий томонга ҳам ўйласа бўлади», деди у.
Экспертнинг қўшимча қилишича, Россия қайтган тақдирда ҳам айрим рақиблар майдонга тушишдан бош тортиши мумкин. Бу вазиятда техник мағлубиятлар муаммони тартибга солиши мумкин: «Ҳар бир ташкилотнинг ўз регламенти бор. Кимдир уни қандай сабаб бўлишидан қатъи назар бузса, белгиланган интизомий чора қўлланиши шарт. Техник мағлубиятлар бошқаларга ҳам сигнал бўлади: бундай демаршлар фойда бермайди, аксинча ўзларига зарар», — дея якунлади Точилин.
Елена Григорьевская