Жикия Туркиядаги ҳолати ҳақида қисқа жавоб берди

"Анталяспор" ҳимоячиси Георгий Жикия турк клубидаги вазияти борасидаги саволларга муносабат билдирди. 32 ёшли футболчининг қисқа изоҳи "ФНЛ с Ильёвым" телеграм-каналида эълон қилинган видеода намойиш этилди. Бу ҳақда euro-football.ru хабар беради.

Жикиядан "Анталяспор"даги ишлар қандай кетаётгани сўралганда, у ҳаммаси жойида эканини айтди. Шунингдек, Туркияда шароитлар кўнгилдагидекми, деган саволга футболчи жилмайган ҳолда барчаси уни қониқтиришини таъкидлади.

Георгий Жикия "Анталяспор" сафига ўтган ёзда келиб қўшилган. Шу вақт ичида у 13 ўйинда майдонга тушиб, икки бор гол уришга ҳам улгурди.

Ҳозирда "Анталяспор" Туркия Суперлигаси турнир жадвалида 14-ўринда бормоқда. Жамоанинг навбатдаги учрашуви 13-февраль куни ўз майдонида "Самсунспор"га қарши бўлиб ўтади.