Марку Силва: «Манчестер Сити»га қарши ўйин доим оғир кечади

«Фулҳем» бош мураббийи Марку Силва АПЛнинг 26-турида «Манчестер Сити»га қарши учрашув олдидан матбуот анжуманида фикр билдирди. Баҳс 11-феврал куни 00:30 да (Тошкент вақти билан) старт олади. Бу ҳақда euro-football.ru хабар беради.

Силванинг айтишича, жамоа таркибида йўқотишлар бор. Оскар Бобб ҳамон жароҳатдан кейинги тикланиш жараёнида ва унга яна вақт керак, шунинг учун мураббийлар штаби футболчини шоширмаслик ниятида.

Шунингдек, Тимоти Кастан ва Сашо Лукич ҳам сафдан чиққан. Мураббий қолган футболчилар ҳолати яхши эканини таъкидлади.

«Манчестер Сити» билан бўладиган ўйин ҳақида гапирган Силва бу рақибга қарши «Фулҳем» учун одатда жуда қийин бўлишини, статистика ҳам жамоа фойдасига эмаслигини эслатди. Шунга қарамай, мураббий ушбу манзарани ўзгартириш истаги борлигини қайд этди.

Силванинг сўзларига кўра, «Эвертон» билан баҳсда очколар бой берилганига қарамай, жамоанинг ўзига бўлган ишончи пасаймаган. У «Фулҳем» майдонда ихчам ҳаракат қилиши, тўп уларда бўлган паллаларда эса тўғри жойлашув ва ечимларни топиши кераклигини урғулади.

Мураббий ўтган мавсумдаги «Манчестер Сити»га қарши учрашувни ҳам эслаб, ўйин жуда шиддатли ўтганини айтди. Унинг фикрича, агар жамоа ўша баҳснинг иккинчи бўлимидаги даражани (нафақат голлар, балки ўйин сифати жиҳатидан ҳам) такрорлай олса, бу яхши натижа учун асос бўлиши мумкин, бироқ якунда барибир ҳисоб ҳал қилувчи омил эканини қўшимча қилди.

Ҳозирда «Фулҳем» турнир жадвалида 34 очко билан 12-ўринда бормоқда. «Манчестер Сити» эса 50 очко жамғарган ҳолда 2-поғонани эгаллаб турибди.