Лаймер янги шартнома учун маошини оширишни сўрамоқда
Мюнхеннинг «Бавария» клуби Конрад Лаймер билан янги шартнома бўйича ҳали келишувга эришгани йўқ. Австриялик футболчининг амалдаги битими 2027 йил ўрталаригача мўлжалланган, клуб эса уни янгилашни хоҳламоқда, бироқ музокаралар осон кечмаяпти. Бу ҳақда euro-football.ru хабар беради.
Bild хабарига кўра, Лаймернинг вакиллари мижозига бонуслар билан бирга йилига 15 миллион евро маош сўрамоқда. «Бавария» эса бундан пастроқ рақамни таклиф қилган. Ҳозирда 28 ёшли футболчининг йиллик даромади тахминан 8–9 миллион еврони ташкил этади.
Лаймер Венсан Компани жамоасидаги ҳозирги ўрнини инобатга олиб, маоши оширилишини ўзига муносиб деб билмоқда. У «Бавария» сафида 2023 йилдан бери тўп сурмоқда, ярим ҳимоядан ўнг қанот ҳимоячиси ролига ҳам мослашиб улгурган.