Фонсека Эндрик борасида ҳакамларни кескин танқид қилди
Франсиянинг "Лион" клуби бош мураббийи Паулу Фонсека "Нант"га қарши ўйинда бразилиялик ҳужумчи Эндрикнинг майдондон четлатилиши юзасидан фикр билдирди. 19 ёшли футболчи "Реал"дан ижара асосида "Лион" сафида тўп тепмоқда. Бу ҳақда euro-football.ru хабар беради.
Фонсека қизил карточкани ҳаддан ташқари оғир қарор деб ҳисоблайди. Унинг айтишича, эпизоддан олдин "Нант" футболчиси аниқ қоида бузган, у тўпга ўйнамай, фақат Эндрикни тўхтатишга уринган. Мураббий Эндрикга кетма-кет учинчи ўйинда рақиблар атайлаб кескин босим ўтказиб, уни асабийлаштиришга уринаётганини таъкидлади ва ҳакамлар бундай вазиятларда аралашиб, истеъдодли футболчини ҳимоя қилиши кераклигини айтди.
Шу билан бирга, Фонсека Эндрик ҳам бўлиб ўтган ҳолатдан сабоқ олиши зарурлигини қайд этди. Мураббий 19 ёшида ва бундай катта салоҳият билан майдондаги вазиятларга эҳтиёткорроқ ёндашиш кераклигини футболчининг ўзига тушунтирганини, айнан шундай мураккаб синовлар эса унинг ўсишига ёрдам беришини қўшимча қилди.
Фонсека ҳакамлик борасидаги ёндашувлар ҳамон бир хил эмаслигидан норози эканини яширмади. У ҳар ҳафта турлича талқинлар учраётгани, қайси ҳолат қизил, қайси эпизод сариқ карточкага тортилиши масаласида аниқ мезонлар бўлиши кераклигини урғулади.
Маълумот учун, Эндрик "Лион" сафида ўтказган 5 ўйинда 5 гол урди ва яна битта голли узатма муаллифи бўлди.