Дортмунднинг «Боруссия»си «Майнц»ни 4:0 ҳисобида тор-мор қилди

Германия чемпионатининг 22-турида Дортмунднинг «Боруссия»си ўз майдонида «Майнц»ни қабул қилди ва учрашувнинг дастлабки дақиқалариданоқ ташаббусни қўлга олди. Бу ҳақда euro-football.ru хабар беради.

10-дақиқада Юлиан Рюурерсоннинг узатмасидан сўнг Серу Гираси боши билан йўллаган зарбаси ҳисобни очди. Орадан беш дақиқа ўтиб, Рюурерсон навбатдаги аниқ пасни амалга оширди — бу сафар Максимилиан Байер «иккинчи қават»да тўпни дарвозага йўналтирди. Танаффус арафасида эса Рюурерсон–Гираси боғланиши яна иш берди ва мезбонлар биринчи бўлимни 3:0 ҳисобида якунлади.

Иккинчи бўлимда «Майнц» дарвозабони бир неча хавфли вазиятларда жамоасини қутқариб қолди: аввал Феликс Нмечанинг зарбасини қайтарди, кейин бурчак зарбасидан кейинги Шералдо Бекернинг уринишига ҳам тайёр турди. Бироқ 84-дақиқада Рюурерсон узатган навбатдаги корнердан сўнг тўп Доминик Кор орқали ўз дарвозасига кириб кетди — автогол ва 4:0.

Ушбу ғалабадан кейин «Боруссия» турнир жадвалида «Бавария»дан уч очко ортда бормоқда, «Майнц» эса қуйи поғоналарда — охиридан бешинчи ўринда қолмоқда.