Монако Нантни енгди, Головиннинг ғалати қизил картаси бўлди

Жума куни Монако ўз майдонида Нантни қабул қилди ва учрашув тақдирини биринчи бўлим ўрталаридаги атиги беш дақиқада ҳал қилиб қўйди. Бу ҳақда euro-football.ru хабар беради.

Ўйин бошида монаколиклар бир нечта хавфли вазиятлар яратди: Головин ҳужумларни марказдан давом эттирди, Каё Энрике ва Балогун иштирокидаги эпизодларда Нант дарвозабони бир неча бор жамоасини қутқариб қолди. Бурчак зарбалари ва қанотлардан узатмалар Монaконинг босимини янада кучайтирди.

25-дақиқада Нант ҳимоясидаги хатодан сўнг Балогун тўпни олиб қўйди, унинг зарбасини дарвозабон қайтарди, аммо Симон Адингра қайтган тўпни бўш дарвозага йўллаб, ҳисобни очди — 1:0. Орадан кўп ўтмай Головин яккама-якка чиқиб кетди ва Адинграга яна бир имконият яратиб берди — 2:0.

30-дақиқада Монако тезкор ҳужумда рақибни «тўртга икки» вазиятида тутиб олди: Головин шеригига қулай пас узатди, Денис Закария эса аниқ зарба билан ҳисобни йириклаштирди — 3:0. Танаффус олдида эса Нант чап қанотдан узатма ташлади, Фабйен Сентонз жарима майдони четидан учиб келган тўпни бир уришда «тўққизлик»ка жойлаб, фарқни қисқартирди — 3:1.

66-дақиқада Головин ҳакам билан баҳс учун огоҳлантирилди, дарҳол унинг ортидан ҳакамга қарсак чалгани сабаб иккинчи жазони олиб, майдондан четлатилди. Якунда Ансу Фати яккама-якка вазиятга чиқди, бироқ Нант дарвозабони дуэлда устун келди.

Ғалабадан сўнг Монако турнир жадвалида 7-ўринда бормоқда, Нант эса қуйи поғоналарда — сўнгги ўринлардан бирида қолмоқда.