«Ал-Наср» мураббийи Роналдунинг танаффус олаётганини айтди

«Ал-Наср» бош мураббийи Жорже Жезуш Криштиану Роналдунинг яқинлашиб келаётган ўйинда майдонга тушмаслиги сабабини маълум қилди. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик юлдузнинг тез орада яна сафга қайтиши кутилаётганди, бироқ бу учрашувда ҳам у таркибда бўлмайди.

Жезушнинг таъкидлашича, тиғиз тақвим сабаб Роналду ва асосий таркибдаги яна бир неча футболчига дам бериш қарори қабул қилинган. Мураббий олдинда «Ал-Фатеҳ»га қарши муҳим ўйин турганини ҳам эслатди.

Al Nassr Zone келтирган иқтибосда Жезуш Роналдунинг бундай тарзда дам олиши янгилик эмаслигини, айниқса Саудия Арабистонидан ташқарида ўтказиладиган учрашувларда у аввал ҳам бир неча бор майдонга тушмаганини қайд этди.

Саудия чемпионатидаги «Ал-Фатеҳ» – «Ал-Наср» учрашуви шанба куни, 14 февраль куни бўлиб ўтади.