«Монако» «Нант»ни енгди ва Головин кулгили тарзда четлатилди

Жума куни «Луи II» стадионида «Монако» «Нант»ни қабул қилди ва учрашув тақдирини бир тайм ўртасида атиги беш дақиқада ҳал қилиб қўйди. Бу ҳақда euro-football.ru хабар беради.

Дастлабки дақиқалардаёқ мезбонлар кескин ҳужумлар уюштирди: Головин бир неча бор марказдан ҳужумни тезлатди, Кайу Энрике ва Балогун билан комбинациялар ишлади, бурчак зарбалари ҳам хавфли чиқди. «Нант» дарвозабони бир неча вазиятда жамоасини қутқариб қолди.

25-дақиқада «Нант» ҳимоясидаги хатодан кейин Балогун тўпни илиб кетди, унинг зарбасини посбон қайтарди, бироқ Симон Адингра қайтган тўпни бўш дарвозага жойлади — 1:0. Орадан уч дақиқа ўтиб Головин дарвозабон билан яккама-якка чиқиб, пасни Адинграга оширди — 2:0. 30-дақиқада «Монако»нинг 4 га 2 қарши тезкор ҳужуми якунида Головин шеригига тўп чиқариб берди ва Денис Закаррия аниқ зарба билан ҳисобни йириклаштирди — 3:0.

Танаффус арафасида «Нант» битта гол билан жавоб қайтарди: Дейвер Мачадо чап қанотдан узатма берди, Фабйен Сентонз эса жарима майдони четида тўпни учиб келганича «тўққизлик»ка михлади — 3:1.

66-дақиқада эса Головин ҳакам билан баҳс учун огоҳлантирилди ва дарҳол ҳакамга қарсак чалганидан сўнг иккинчи жазони олиб, майдонни тарк этди. Ўйин сўнгида Ансу Фати яккама-якка вазиятга чиқди, аммо «Нант» дарвозабони дуэлда устун келди.

Ғалабадан кейин «Монако» турнир жадвалида 7-ўринда бормоқда, «Нант» эса сўнггидан иккинчи поғонада қолди.