Мартинес Роналдунинг қачон кетишини ўзи белгилашини айтди

Португалия терма жамоаси бош мураббийи Роберто Мартинес Криштиану Роналдунинг футболчилик фаолиятини қачон якунлаши мумкинлиги ҳақидаги саволга муносабат билдирди. Бу ҳақда euro-football.ru хабар беради.

Февраль бошида 41 ёшни қарши олган ҳужумчи ҳақида гапирган мутахассис унинг жисмоний кўрсаткичлари ҳали узоқ вақт юқори даражада ўйнашга етишини таъкидлади.

«Унинг жисмоний ҳолати яна, яна ва яна ўйнашга имкон беради. Менимча, масала шунда: у қачон ўзи учун тўғри пайт келганини ҳис қилади. У жуда ўзига талабчан футболчи. Қачонки энди жамоага фойдаси тегмаётганини англаб етса, ўшанда тўхташ ҳақида қарор қилади», — деди Мартинес BBC'га берган интервьюсида.

Клуб миқёсида Роналду Саудия Арабистонининг «Ал-Наср» жамоаси шарафини ҳимоя қилмоқда. Хабарларга кўра, юлдуз футболчи клуб бошқарувидан норози бўлиб, бир неча учрашувни ўтказиб юборганидан сўнг шанба куни таркибга қайтиши кутилмоқда.

«Ал-Фатех» — «Ал-Наср» учрашувини LiveResult сайтида матнли трансляция орқали кузатиш мумкин.