Корнеев: «Жирона» «Барселона»га янада кўпроқ уриши мумкин эди

Ла Лиганинг 24-турида «Жирона» билан ўйинда «Барселона» ҳимояда жуда суст кўринди. Буни ЦСКА собиқ ярим ҳимоячиси Игор Корнеев таъкидлади. Бу ҳақда euro-football.ru хабар беради.

Унинг фикрича, каталонияликлар атиги икки гол ўтказиб юборгани билан ҳам омади чопган.

«Ҳимояда бундай ўйнаб бўлмайди. “Жирона” бироз чаққонроқ бўлганида, янада кўпроқ гол урарди», — деди Корнеев «Матч ТВ» эфирида.

Корнеевнинг айтишича, «Барселона» рақиби камида ўнлаб хавфли вазиятлар яратган — уларнинг бир қисми голга жуда яқин эпизодлар бўлган.

1:2 ҳисобидаги мағлубиятдан сўнг «Барселона» Испания чемпионатида пешқадамликни бой бериб, Мадриднинг «Реал» клубини олдинга ўтказиб юборди. Ҳанс-Дитер Флик жамоаси «қаймоқранглилар»дан икки очко ортда қолмоқда.