«Бока Хуниорс» клубида янги спорт директори иш бошлади

Аргентинанинг «Бока Хуниорс» клуби спорт директори лавозимига янги номзодни тасдиқлади: ушбу вазифани энди Марсело Делгадо бажаради. Клуб раҳбарияти у президент Хуан Рикельме билан яқин ҳамкорликда ишлашини маълум қилди. Бу ҳақда euro-football.ru хабар беради.

Жамоа таркибни зудлик билан кучайтиришга муҳтож экани таъкидланмоқда. Шу сабаб Делгадо ва Рикельме дуэти трансферлар ва селекция йўналишида тезкор қарорлар устида ишлаши кутилмоқда.

Делгадо футболчилик фаолиятида ҳам катта тажриба тўплаган: у 1995–2002 йилларда Аргентина терма жамоаси сафида 18 та учрашув ўтказган ва 1998 йилги жаҳон чемпионатида ҳам иштирок этган. 2003 йилда эса у Либертадорес кубогининг энг яхши тўпурари бўлиб, бу совринни «Сантос» ҳужумчиси Рикардо Оливейра билан бўлишиб олган.