Конрад Лаймер янги шартнома бўйича музокара йўқлигини айтди

Мюнхеннинг «Бавария» клубида тўп сураётган ҳимоячи Конрад Лаймер жамоа билан шартномани узайтириш эҳтимоли ҳақида фикр билдирди. Бу ҳақда euro-football.ru хабар беради.

Австриялик футболчининг сўзларига кўра, ҳозирча томонлар ўртасида деярли ҳеч қандай фаол музокара кетмаяпти. «Ҳозир музокаралар деярли йўқ. Барибир хотиржамман, бу ҳақда ортиқча бош қотиришнинг ҳожати йўқ», — дея Лаймернинг гапларини SPORT BILD келтирди.

Лаймер «Бавария»га 2023 йил ёзида келиб қўшилган. Жорий мавсумда 28 ёшли футболчи барча мусобақаларда 29 та учрашувда майдонга тушиб, 2 та гол урди ва 8 та голли узатмани амалга оширди.

Ҳимоячининг Мюнхен гранди билан амалдаги шартномаси 2027 йил ўрталаригача мўлжалланган. Transfermarkt маълумотига кўра, Лаймернинг бозор қиймати 32 миллион еврога тенг.