«Милан» «Комо» қаршилигини енга олмади ва дуранг қайд этди

Серия А 24-туридан қолдирилган баҳсда «Милан» ўз майдонида «Комо»ни қабул қилди. «Сан-Сиро»даги учрашувда томонлар 1:1 ҳисобида муросага келди. Бу ҳақда euro-football.ru хабар беради.

Биринчи бўлим ўрталарида меҳмонлар чап қанотдан хавфли ҳужум уюштирди: Мартин Батуринанинг узатмасидан сўнг Мергим Войвода узоқ бурчакка аниқ оширди, бироқ эпизод офсайд сабабли бекор қилинди. «Милан»нинг жавоб ҳужумида Рафаэл Леау жарима майдонига ёриб кириб, яқин бурчакка зарба берди, дарвозабон эса тўпни кўкраги билан қайтариб, бурчак зарбасига чиқариб юборди.

32-дақиқада «Милан» дарвозабони Майк Меньян кутилмаганда тўпни рақибга ҳадя қилди ва Николаас Пас жарима майдони ташқарисидан йўллаган зарбаси билан ҳисобни очди — 0:1. Орадан кўп ўтмай Фикайо Томори жарима майдони ичида бир тегинишда зарба берди, аммо «Комо» посбони сакраб тўпни бурчакка йўналтирди.

64-дақиқада Ардон Яшари узатган узун пасдан кейин Леау тезликда олдинга чиқиб кетди. «Комо» дарвозабони жарима майдонидан ташқарига шошилиб чиқиб кетди ва португалиялик ҳужумчи ундан тўпни ошириб ташлаб, мувозанатни тиклади — 1:1.

Учрашув якунига яқин, 81-дақиқада «Милан» бош мураббийи Массимилиано Аллегри «Комо» штабидаги Сеск Фабрегас ёрдамчиларидан бири билан тортишиб қолди. Натижада ҳакам ҳар икки томонга қизил карточка кўрсатди.

Ўйин давомида «Милан» аниқ устунликка эриша олмади ва 1:1 ҳисобини мантиқан адолатли натижа дейиш мумкин. «Россонерилар» турнир жадвалида иккинчи ўринда бормоқда ва етакчи «Интер»дан етти очко орқада қолмоқда, «Комо» эса 6-ўрин учун курашаётган жамоалар гуруҳида жойлашган.