Майкл Олисе учун "Челси" ва "Манчестер Сити" катта пул тайёрламоқда...

Франциялик ҳужумкор футболчи Майкл Олисе “Бавария” таркибида Бундеслигада жуда ёрқин кўриниш бергач, уни яна Англия Премьер-лигасида кўриш эҳтимоли ошмоқда. Бу ҳақда инсайдер Экрем Конур ижтимоий тармоқларда маълум қилди.

Манбага кўра, Олисени ўз сафига қўшиб олиш учун “Челси” ва “Манчестер Сити” катта сармоя қилишга тайёр. Икки клуб ҳам ёзги трансфер ойнасида 24 ёшли футболчи учун жиддий курашга киришмоқчи.

“Бавария” эса ўз позициясини қаттиқ ушлаб турибди: немис гранди Олисени фақат 150 миллион евро миқдорида таклиф тушган тақдирдагина сотиш вариантини кўриб чиқиши мумкин. Футболчининг Мюнхен клуби билан шартномаси 2029 йил ўрталаригача амал қилади.

Эътиборли жиҳати, Олисе аслида “Челси” тарбияланувчиси ҳисобланади. Бироқ лондонликлар уни асосий жамоада қолдирмаган ва 2020 йили “Рединг”га қўйиб юборган. Орадан бир йил ўтиб, “Кристал Пэлас” иқтидорли ўйинчини 9,3 миллион еврога сотиб олган.

2024 йил ёзида эса “Бавария” Олисе учун “Кристал Пэлас”га 53 миллион евро тўлади. Ана шу кўчишдан кейин Майклнинг ўйини янада очилиб кетди: жорий мавсумда у барча мусобақаларда 33 та учрашувда майдонга тушиб, 13 та гол урди ва 24 та голли пас муаллифи бўлди.

Қисқаси, Олисе атрофидаги бу шов-шув бекорга эмас: форма бор, рақамлар бор, қизиқиш бор. Энди энг катта савол — “Бавария” 150 миллионлик талабидан қайтмайдими ёки АПЛ грандларидан бири “ҳаммасига тайёрман” деб чиқадими?