Паулу Фонсека Миланда ўзига кўпроқ вақт сўради
"Милан"нинг собиқ бош мураббийи Паулу Фонсека Италия клубидаги қисқа фаолияти ҳақида фикр билдирди. Бу ҳақда euro-football.ru хабар беради.
Португалиялик мутахассиснинг айтишича, у "Милан"да кўпроқ ишлаш имкониятига лойиқ эди. Фонсека клубни ажойиб жамоа сифатида таърифлаб, у ерда ишлашдан катта завқ олганини, бироқ вақт етишмагани учун афсусда эканини таъкидлади. Унинг сўзларига кўра, раҳбарият жамоа ўйин услубини янада ҳужумкор моделга ўтказишни истаган, аммо йиллар давомида шаклланган тизимни тезда ўзгартириш осон эмас.
Эслатиб ўтамиз, Фонсека "Милан"ни 2024 йил июлидан декабригача бошқарган. Ҳозирда 53 ёшли мураббий французнинг "Лион" клубида бош мураббий лавозимида ишламоқда.
"Милан" эса Массимилиано Аллегри қўл остида А Серия турнир жадвалида 54 очко билан иккинчи ўринда бормоқда.