Женоа Торино устидан йирик ҳисобда ғалаба қозонди
Италия А Сериясининг 26-турида якшанба кунги ўйинлар дастури Женоа ва Торино учрашуви билан бошланди. Бу ҳақда euro-football.ru хабар беради.
21-дақиқада Калеб Экубан дарвозага аниқ зарба йўллади, дарвозабон қайтарган тўпни эса Брук Нортон-Каффи якунлаб, ҳисобни очди. Биринчи бўлим охирларида Женоа яна бир бор босимни кучайтирди: Томмазо Балданзининг уринишидан кейин қайтган вазиятни Экубан охиригача ўйнаб, ҳисобни 2:0 га етказди. Қўшиб берилган дақиқаларда Торино футболчиси Эмирҳан Илҳан Лоренцо Коломбога қўпол ҳаракати учун қизил карточка олди.
Учрашувнинг 83-дақиқасида Торино ҳимоясида Маркус Педерсен хатоға йўл қўйди ва бундан фойдаланиб қолган Жуниор Мессиас учинчи голни уриб, Женоанинг йирик ҳисобдаги ғалабасини расмийлаштирди — 3:0.
Натижадан сўнг жамоалар турнир жадвалида 14-ўринни бўлишиб турибди, тушиб кетиш зонасидан фарқ олти очкони ташкил этади.