«Манчестер Сити» «Арсенал»ни қувмоқда: «акула» кайфияти қайтдими?

Англия Премьер-лигаси ҳал қилувчи бурилишга кириб келган бир пайтда чемпионлик пойгаси яна қизиб кетди. Мусобақада бир муддатдан бери етакчиликни ҳеч кимга бермай келаётган “канонирлар”га энди “шаҳарликлар” етиб олиш учун реал имконият топаётгани сезиляпти.

Аввалги мавсумларда ҳам Микель Артета шогирдлари чемпионат мобайнида тепада юриб, охирида зўр финиш қилган "Ливерпуль" ёки “Сити”га совринни бой бериб қўйган ҳолатлар бўлган. Шунинг учун ҳам босим катта: айтилишича, агар бу гал ҳам чемпионлик келмаса, клуб раҳбарияти Артета бўйича жиддий қарорларни муҳокама қилиш эҳтимоли бор.

Экспертлар эса битта нарсани алоҳида таъкидлаяпти: “Сити” ҳозирнинг ўзидаёқ рақибга психологик босимни ошириб бормоқда. Хусусан, 27-турда “шаҳарликлар” энг қийин рақиблардан бири — "Ньюкасл Юнайтед"ни оғир ўйинда енгиб, ўз мақсадини яна бир бор намойиш қилди. Нуфузли манба — CityXtra.co.uk экспертлари айнан шу баҳсдан келиб чиқиб, мухлислар учун 5 та муҳим хулосани ажратиб кўрсатди.

1. “Акулалар” яна қон ҳидини сезди

“Сити” сўнгги йилларда чемпионлик пойгасида ўзини худди “акула жамоа”дек тутади: пешқадам рақибни тинмай таъқиб қилади, сўнг финишда бир зумда қувиб ўтиб, совринни илиб кетади. Бунга ўхшаш сценарийлар олдин ҳам кўп бўлган, шу сабаб ҳозир “яна шундай бўлиб қолмасин” деган ҳис мухлисларда табиий пайдо бўляпти.

Масалан, икки ҳафта олдин Энфилдда Доминик Собослаи жаримадан гол урганидан кейин “Сити”нинг пойгадаги кайфияти тушиб кетгандек кўринган. Аммо жамоа ўша баҳсда ўзини йўқотмади ва чемпионликка максимал яқинлашиш “режими”га қайта кирди. “Ньюкасл” қарши ўйинда ҳам хавфли вазиятлар яратди, лекин “Сити” позициясини мустаҳкам сақлаб қолди — демак, босим давом этади.

2. Нико О’Райли — ҳақиқий жангчи

Жамоага руҳ, импульс ва “қўшимча бензин” керак бўлганда ҳар сафар О’Райли ўзининг энг яхши сифатларини чиқариб келяпти. Ёшига қарамасдан катта саҳнада ўзини йўқотмаслиги — алоҳида ҳурматга лойиқ.

“Ньюкасл”га қарши баҳсда у ҳисобни очишга хизмат қилган ҳужумни якунлаш эпизодида жуда зўр техника кўрсатди — ҳатто бу ҳаракатлар гол машинаси услубини эслатди. Кейинги гол эса ўйин йўналишини “Сити” фойдасига бурди. Энг ёққани: у ҳимояда ҳам, ярим ҳимояда ҳам, олдинда ҳам ишлайди — академия ёшлари учун тирик “намуна”, йўл очиқлигини кўрсатиб турибди.

3. Абдуқодир Ҳусанов ва Марк Гехи — ҳимоя девори

Бир неча йил олдин “Сити”ни ўйиннинг катта қисмини ҳимояда ўтказишига ишониш қийин эди. Лекин 2026 йил манзараси бошқача: Гвардиола жамоаси кўпроқ “жанговар” ва амалий футболга ўтаётгани сезилади.

Марказий ҳимояда Ҳусанов ва Гехи каби футболчилар билан устунлик пайдо бўлди, дарвоза олди эса Жанлуижи Доннарумма келиши билан янада мустаҳкам туюляпти. “Ньюкасл”нинг қаттиқ босимига қарамай, айнан шу учлик эпизодларни “ўчириб”, жамоанинг ғалабасини сақлаб қолишда катта роль ўйнади. Бу мавсум “Сити”нинг янги кучли қуроли — тартибли ҳимоя бўлиб қоляпти.

4. Эрлинг Холанднинг меҳнатсеварлиги кўзга ташланди

Ҳоланд — голлар бўйича “станок” эканини ҳамма билади. Лекин унинг тўпсиз ҳаракатлари, прессингдаги иши ва жамоа учун “қора иш”и кўпинча сояда қолиб кетади.

“Ньюкасл”га қарши баҳсда у айнан шу жиҳатлари билан жуда керакли бўлди: энергия, тинимсиз ҳаракат ва тўғри қарорлар — жамоанинг уч очкосида катта улуш. О’Райлига берилган аниқ пас ҳам шунинг исботи: у фақат гол уриш эмас, натижа учун ўйнашни ҳам билади. Чемпионлик тақдири май ойида қай томонга оғишини айта олмаймиз, лекин Холанднинг формаси “калит” омил бўлиб қолади.

5. Ўз уйингда ҳаво ҳам сен томонда

“Сити”нинг Этихадда “Ньюкасл”га қарши уй серияси анча кучли эди: сўнгги 21 та уй ўйинида мағлубият йўқ, 16 тасида ғалаба. Бу рекорд яна бир учрашувга узайди.

Лекин бу сафар “шаҳарликлар”га олдингидек осон бўлмади — ғалаба учун ҳақиқий маънода тер тўкишга тўғри келди. Барибир, уй майдонидаги ишонч ва мухлислар қуввати жамоани “охиригача ушлаб турди”.

Хулоса шу: пойга энди бошланяпти, нервлар ҳам, интрига ҳам ошади. “Арсенал” учун бу — чидам ва барқарорлик имтиҳони, “Сити” учун эса охирида “газни босиб кетиш”. Мухлисларга айтадиган гап битта: попкорнни тайёрлаб қўйинг, чунки Премьер-лига охири одатда сериалдан ҳам зўр чиқади.