Аргентина чемпионати федерация можароси туфайли танаффус олади

Аргентина чемпионати бир ҳафталик танаффус олади: 9-тур учрашувлари кейинроқ ўтказилади. Бунга мамлакат футбол федерацияси атрофида навбатдаги коррупция можароси сабаб бўлди. Бу ҳақда euro-football.ru хабар беради.

Эътиборлиси, 7 ва 8-тур ўйинлари белгиланганидек ўтказилади, танаффус эса айнан 5–8 март кунларига режалаштирилган 9-тур тақвимига тўғри келади. Бу 5 март куни AFA президенти Клаудио Тапиа трибунал олдида жавоб бериши кераклиги билан боғланмоқда.

derbyderbyderby.it хабарига кўра, собиқ футболчилар ва ходимларга пенсия тўловлари билан боғлиқ схема орқали 19 миллиард песо миқдоридаги солиқдан қочилгани айтилаётган (Еврода бу қарийб 12 миллион). Шунингдек, федерация тузилмаси пул ювиш жараёнларида ҳам иштирок этган бўлиши мумкинлиги ҳақида гумонлар бор.