«Бенфика» ҳимоячиси Винисиусдан футболка сўрагани учун узр сўради
«Бенфика»нинг ўнг қанот ҳимоячиси Сидни Лопеш Кабрал Чемпионлар лигасида Мадриднинг «Реал»ига қарши ўйиндан кейин Винисиус Жуниордан футболка алмашишни сўрамоқчи бўлди. Бу ҳақда euro-football.ru хабар беради.
23 ёшли футболчи бу ниятини бразилиялик юлдузга айтишга ҳам улгурган, бироқ клуб ичида буни нотўғри қабул қилишлари мумкинлигини англагач, фикридан қайтган. Record хабарига кўра, Кабрал ҳатто жамоадошларидан бу ҳолат учун узр сўрашига тўғри келган.
Жавоб учрашувида «қаймоқранглилар» 2:1 ҳисобида ғалаба қозонди, ҳал қилувчи гол эса Винисиус ҳисобига ёзилди. Ўтган ҳафта Лиссабонда ўтган илк баҳсда ҳам ягона гол муаллифи айнан у бўлган, аммо ўша ўйинда Винисиуснинг нишонлаш услуби ва у Жанлука Престяннини ирқчилик ҳақоратида айблагани кўпроқ муҳокама қилинганди.