Арбелоа Родригони «Реал»нинг ҳал қилувчи кучи деб билади

Мадриднинг «Реал» жамоаси бош мураббийи Альваро Арбелоа ҳужумчи Родриго ҳақида фикр билдирди. Бу ҳақда euro-football.ru хабар беради.

Мутахассиснинг айтишича, Родриго жароҳатларигача ҳам жамоа учун муҳим рол ўйнаган ва яна «Реал»нинг асосий таянчларидан бирига айланиши мумкин. Арбелоа уни ҳал қилувчи футболчи бўлиш салоҳиятига эга деб баҳолади.

Мураббий Родриго «Реал» сафида йиллар давомида ўз даражасини исботлаб келаётганини таъкидлади. Унинг фикрича, бразилиялик футболчи ҳужумнинг учала нуқтасида ҳам ўйнай олади: техникаси, майдонни кўра билиши, ҳужумга қўшилиши, якунловчи зарбаси ва яккама-якка вазиятлардаги устунлиги юқори. Арбелоа Родриго универсаллиги сабаб ҳимоячилар учун жуда ноқулай рақиб эканини ҳам қўшимча қилди.

«У бизга турли тактика ва ечимлар учун кўплаб вариант беради. Мен унинг қайтишини жуда хоҳлайман. Умид қиламанки, у аста-секин кўпроқ дақиқа тўплайди ва жамоада янада муҳимроқ фигурага айланади», — деди Арбелоа журналистлар билан суҳбатда.

«Реал» 2 март, душанба куни Ла Лигада «Хетафе»ни қабул қилади.