Ла Лига пешқадами «Барселона» Бильбао майдонида қийналмоқда

Испания чемпионати доирасида ўтаётган марказий учрашувларнинг бирида "Барселона" клуби Бильбао шаҳрида "Атлетик" меҳмони бўлмоқда. Биринчи тайм якунларига кўра, жамоалар танаффусга 0:0 ҳисобидаги дуранг билан чиқиб кетишди.

Ўйин давомида каталонияликлар тўп назоратини тўлиқ ўз қўлларида ушлаб туришди. Статистикага кўра, "Барселона" 78 фоиз вақт давомида тўпга эгалик қилган ва 370 та аниқ пас узатган. Шунга қарамай, "Атлетик" ҳимоячилари тартибли ўйин кўрсатиб, рақиб ҳужумларини бартараф этишга муваффақ бўлишди. Мезбонлар эса қарши ҳужумларда ўз имкониятларини кутишмоқда.

Айни дамда "Барселона" 65 очко билан Ла Лига турнир жадвалида пешқадамлик қилмоқда. Уларнинг асосий таъқибчиси "Реал Мадрид" 63 очко билан иккинчи ўринда бормоқда. "Барселона" учун ушбу баҳсда ғалаба қозониш чемпионлик пойгасидаги ўрнини мустаҳкамлаш учун жуда муҳим ҳисобланади. "Атлетик Бильбао" эса 36 очко билан жадвалнинг ўрталарида мустаҳкам ўрнашган.