ՀՔԾ-ն ուսումնասիրում է փոխոստիկանապետ Լևոն Երանոսյանի ու մյուս ոստիկանների հայհոյանքների ու բռնությունների տեսանյութերը
Հատուկ քննչական ծառայությունը դեռ որոշում չի կայացրել ոստիկանների ու ոստիկանապետ Լևոն Երանոսյանի՝ այսօր գիշեր ցուցարարների հանդեպ կիրառած բռնության ու հայհոյանքների առթիվ: Համացանցում տեսանյութեր են տարածվել, թե ինչպես են Խորենացու ցույցը ցրելու ժամանակ ոստիկանները հայհոյում, խփում ու երբեմն նվաստացնում ցուցարարներին:
«Ա1+» հեռուստաընկերությունը նկարահանել է, թե ինչպես է ոստիկանության զորքերի հրամանատար, փոխոստիկանապետ Լևոն Երանոսյանը սեռական բնույթի հայհոյանք տալիս ձեռնաշղթաներ հագցրած քաղաքացուն, որին ոստիկանները կռացրած բերման են ենթարկում փողոցում:
Տեսանյութում՝ 01։58 րոպեից 02։01։
Հատուկ քննչական ծառայության մամուլի խոսնակ Միքայել Ահարոնյանը Tert.am-ի հարցին, թե ՀՔԾ-ն չի՞ պատրաստվում քրգործ հարուցել փոխոստիկանապետ Լևոն Երանոսյանի ու ոստիկանների հայհոյանքների ու բռնությունների առթիվ, ասաց. «Հուլիսի 17-ի սկսված ՀՔԾ-ն ուսումնասիրում է ԶԼՄ-ներում տեղ գտած բոլոր հրապարակումները: Բոլոր նյութերն այս պահին ուսումնասիրվում են»:
Հստակեցմանը, թե նաև Լևոն Երանոսյանի հայհոյանքի մա՞սն է ուսումնասիրվում, Ահարոնյանն ասաց. «Դեպքերի վերաբերյալ բոլոր հրապարակումները, որոնք պարունակում են պաշտոնատար անձանց կողմից ենթադրյալ հանցագործություն կատարելու հատկանիշներ, ուսումնասիրվում են»:
Դիտարկմանը, թե այսօր գիշեր կատարվածի վերաբերյալ արդեն ցուցարարների դեմ քրգործ հարուցվել է, մինչ այդ էլ է գործ հարուցվել քննչական կոմիտեում, իսկ պաշտոնյաների հանցագործությունների մասով դեռ քրգործ չի հարուցվել և արդյոք այդտեղ միտում չկա՞, ՀՔԾ խոսնակն ասաց. «Դա ձեր ենթադրությունն է ընդամենը: Նյութերը պետք է ուսումնասիրվեն, դրանից հետո քրեադատավարական որոշումներ պետք է կայացվեն, որի մասին կհատնենք լրացուցիչ»:
Նշենք, որ Մարդու իրավունքների պաշտպանը դեռ 2 օր առաջ հայտարարել է, որ «Ազատության հրապարակում 3 օր առաջ տեղի ունեցած խաղաղ հավաքի ընթացքում արձանագրվել են քաղաքացիների իրավունքների խախտման ակնհայտ դեպքեր և զանգվածային լրատվության միջոցներով տարածվել են տեղեկություններ խոշտանգման փաստերի վերաբերյալ: Հաշվի առնելով, որ դրանք պարունակել են նաև առերևույթ հանցագործության հատկանիշներ՝ մեր կողմից քրեական գործի հարուցման հարցի լուծման նպատակով ուղարկվել են քրեական հետապնդման մարմիններին»:
Այսօր գիշեր Երևանի Խորենացի փողոցում տեղի ունեցած միջադեպից հետո Երևանի քննչական վարչությունում հարուցվել է քրեական գործ՝ ՀՀ քրեական օրենսգրքի 225-րդ հոդվածի 2-րդ մասի հատկանիշներով:
Հուլիսի 21-ին՝ ժամը 08-ի դրությամբ, զանգվածային անկարգություններին անմիջական մասնակցություն ունենալու կասկածանքով բերման է ենթարկվել 28 անձ, որոնցից 16-ը ձերբակալվել է:
Մարինե Խառատյան