Մենք պետք է գնանք խելացի սպառազինման ճանապարհով. Վիգեն Սարգսյան
Մեր պաշտպանության ամբողջ գաղափարախոսությունը կառուցված է այդպիսի դիվերսիոն փորձերի պարբերականության և հնարավոր կրկնության կանխավարկածի վրա։ Մենք գիտենք, որ ադրբեջանական կողմն ունի շատ հստակ և բացահայտ արտահայտվող ագրեսիվ վերաբերմունք և պարբերաբար շեշտում է ռազմական միջոցով խնդիրը լուծելու իր ցանկության և պատրաստակամության մասին։
«Արմենիա» հեռուստաընկերության ուղիղ եթերում, անդրադառնալով ադրբեջանական զինված ուժերի կողմից դիվերսիոն փորձերին, նման տեսակետ հայտնեց ԼՂՀ-ում գտնվող ՀՀ պաշտպանության նախարար Վիգեն Սարգսյանը` հավելելով, որ մեր մարտական հերթապահությունը կազմակերպվում է հենց այդ տրամադրությանն արձագանքելու տեսանկյունից:
Նա մեջբերեց նաև Իսրայելի վարչապետներից մեկի խոսքը. «Նման փորձերը շարունակվելու են այնքան ժամանակ, մինչև նրանք իրենց զավակներին սկսեն սիրել ավելի շատ, քան ատում են մեր զավակներին»:
Վիգեն Սարգսյանը կարևորեց այն, որ զինվորները ունեն բարձր մարտական պատրաստվածություն, հանգիստ կարողանում են իրենց խնդիրը լուծել, հարկ եղած դեպքում էլ` պատժել:
Նախարարի գնահատմամբ`ՀՀ զինված ուժերը և ՊՆ-ն ամենաուժեղ ու կայացած պետական կառույցներ են: Նախարարը նաև երեք կարևոր խնդիր առանձնացրեց ` խելացի սպառազինումը, կոռուպցիոն դրսևորումների վերացումը և հասարակության մեջ սպայի կերպարի արժևորումը:
«Մեզ պարտադրում են սպառազինությունների մրցավազք, մենք պետք է կարողանանք քայլ առաջ անել և պատրաստվել ոչ թե երեկվա, այլ վաղվա պատերազմին: Այդ ճանապարհին մենք պետք է շատ սթափ գնահատենք, թե որն է մեր կարիքը, ինչ ունենք մեր զինանոցներում և ինչ պետք է ավելացնել, որ այդ պայքարը նվազագույն միջոցներով, առավելագույն արդյունք տա»,- ասաց նա։
Նախարարի խոսքով` մենք պետք է ամեն ինչի դիմաց նույն տիպի զինատեսակ ունենալու գայթակղությունը վերանայենք և գնանք խելացի սպառազինման ճանապարհով: