Хәмер эчкән кешеләр нинди авырулардан үлә?

Россиядә алкогольгә каршы дәүләт сәясәте чаралары кулланыла. Илдә алкогольне чамадан тыш куллану белән бәйле сәбәпләрдән авырулар санын һәм үлем-китемне киметергә мөмкинлек бирүче тикшеренүләр үткәрелә. 

Татарстан Сәламәтлек саклау министрлыгының матбугат хезмәте хәбәр иткәнчә, тикшеренүләр түбәндәге нәтиҗәләр күрсәткән.

Эшкә яраклы яшьтәге ир-атлар үлеменең 60 процентка якыны – алкоголь белән ассоциацияләнгән сәбәпләр.

Алкогольне күп куллану баш һәм муен шешләреннән үлү куркынычын 3,3 тапкыр, бавыр яман шешеннән – 2,1 тапкыр, туберкулездан – 4,1 тапкыр, бавыр авыруларының барлыкка килү куркынычын – 6,2 тапкыр, йөрәкнең көчле ишемик авыруы барлыкка килү куркынычын – 3 тапкыр, ашказаны асты бизе авыруларының килеп чыгу куркынычын 7 тапкыр диярлек арттыра.

Алкогольне күп куллану – пенсия яшенә кадәрге ир-атларның «кинәт йөрәк үлеме» яки йөрәкнең ишемик авырулар белән бәйле үлеменең 90 процентка кадәренең сәбәбе була.

Алкогольне күп кулланганда төрле бәхетсезлек очраклары куркынычы – 5 тапкыр, ә юл-транспорт һәлакәтләре 4 тапкыр арта.

Шуның белән бергә психик авырулар, йогышлы булмаган һәм йогышлы авырулар, шулай ук травмалар арасындагы сәбәп-нәтиҗә элемтәсе расланды, дип хәбәр итте Республика иҗтимагый сәламәтлек һәм медицина профилактикасы үзәге.