Ֆրանսիան՝ Եվրո-2016-ի 1/8 եզրափակիչում
Ֆրանսիայի հավաքականը քիչ առաջ Մարսելում ավարտված խաղում 2:0 հաշվով հաղթանակ տարավ Ալբանիայի թիմի նկատմամբ և խմբային մրցաշարի վերջին` երրորդ հանդիպումից առաջ արդեն ապահովեց իր մասնակցությունը ֆուտբոլի Եվրոպայի 2016 թվականի առաջնության 1/8 եզրափակիչին։
Երկու գոլերն էլ գրանցվեցին խաղավերջին. 90-րդ րոպեին Անտուան Գրիզմանը, իսկ խաղի հիմնական ժամանակին մրցավարի ավելացրած 6-րդ րոպեին՝ Դիմիտրի Պայեն գրավեցին ալբանացիների դարպասը։ Սա Պայեի երկրորդ գոլն է Եվրո-2016-ում։
Առաջնությունը հյուրընկալող Ֆրանսիայի հավաքականը երկրորդ անընդմեջ հաղթանակը տարավ A խմբի մրցաշարում՝ 6 միավորով զբաղեցնելով առաջին հորիզոնականը։
Նույն խմբում ընդգրկված Ռումինիայի և Շվեյցարիայի հավաքականների հանդիպումը չորեքշաբթի օրը ավարտվեց ոչ-ոքի՝ 1:1, B խմբում Սլովակիայի թիմը 2:1 հաշվով առավելության հասավ Ռուսաստանի հավաքականի նկատմամբ։