«Барселона» ҳимоя марказига қандай футболчини олиб келмоқчи экани маълум бўлди

Каталониянинг "Барселона" клуби қишки трансфер ойнасида марказий ҳимоя чизиғини мустаҳкамлаш режасини тайёрлаб қўйган. Жамоа раҳбарияти ҳимоя марказида юзага келган муаммоларни нисбатан арзон, аммо катта тажрибага эга футболчи ҳисобидан ҳал қилишни мақсад қилган. Бу ҳақда Испаниянинг нуфузли нашрларидан бири Mundo Deportivo хабар тарқатди.

Манба маълумотига кўра, «кўк-анорранглилар» трансфер бозорида аввало етакчилик фазилатларига эга, катта ўйин тажрибаси билан жамоани мувозанатда ушлаб тура оладиган футболчиларга эътибор қаратмоқда. Клуб шу йўл орқали ўтган ёзда жамоани тарк этган Иниго Мартинез қолдирган бўшлиқни тўлдиришни истаяпти.

Ҳозирча «Барселона»нинг эҳтимолий номзодлари рўйхатига уч нафар марказий ҳимоячи киритилган. Улар орасида Португалиянинг "Бенфика" клуби сардорларидан бири, жаҳон чемпионати ғолиби Николас Отаменди (37 ёш), Италиянинг "Интер" жамоасида тўп сураётган Стефан де Врей (33 ёш) ҳамда Англия Премьер-лигасидаги "Борнмут" сафида ўйнаётган аргентиналик Маркос Сенеси (28 ёш) бор.

Transfermarkt портали баҳоларига кўра, энг арзон вариант сифатида Отаменди кўрилмоқда — унинг бозор қиймати тахминан 1 миллион еврога тенг. Де Врей 3,5 миллион евро атрофида баҳоланаётган бўлса, нисбатан ёшроқ ва истиқболли ҳисобланган Сенесининг трансфер қиймати 22 миллион еврогача етади.

Каталония клуби учун бу қарор молиявий имкониятлар ва жамоанинг жорий эҳтиёжларидан келиб чиққан ҳолда қабул қилинмоқда. Шу боис, «Барселона» мухлислари яқин ҳафталарда ҳимоя марказида тажрибали футболчининг пайдо бўлишини катта қизиқиш билан кутиб турибди.