Дяков FIFA АҚШга нисбатан санкция қўлламайди деб ҳисоблайди
Москванинг “Динамо” жамоасида тўп сурган собиқ ҳимоячи Виталий Дяков FIFA шов-шувли сиёсий воқеаларга қарамай, АҚШнинг Жаҳон чемпионатига мезбонлик мақомини қайта кўриб чиқмайди, деган фикрда. Бу ҳақда euro-football.ru хабар беради.
Унинг айтишича, халқаро футбол ташкилотлари бундай вазиятларда кўпинча танлаб ёндашади ва натижада йирик турнирлар режадагидек давом этаверади.
“Кўряпмиз: Исроилга ҳеч қандай санкция қўлланмаган. Энди ҳам, эҳтимол, АҚШга нисбатан ҳам чоралар кўрилмайди — мундиал ҳам яқин. Уларга барибир кўп нарса кечирилади, бу эса иккиёқлама стандарт”, — дея Дяковнинг сўзларини “Match TV” келтиради.
Эслатиб ўтамиз, аввалроқ АҚШ президенти Доналд Трамп Венесуэлага қарши кенг кўламли ҳарбий амалиёт ўтказилганини билдирган, ушбу жараёнда мамлакат раҳбари Николас Мадуро қўлга олингани ҳам айтилган.