Флетчер “МЮ” рулини қўлга олишдан олдин Фергюсондан маслаҳат олди

“Манчестер Юнайтед”да навбатдаги катта ўзгаришлар фонида клуб руллари вақтинча Даррен Флетчер қўлига ўтди. Рубен Аморим ишдан бўшатилганидан сўнг, Флетчер “қизил иблислар”нинг бош мураббийи вазифасини вақтинча бажарувчи сифатида тайинланди. Ва энг қизиғи — у бу қарорни қабул қилишдан олдин биринчи навбатда сэр Алекс Фергюсон билан гаплашганини очиқ айтди.

Флетчернинг таъкидлашича, бу воқеа унга кутилмаганда “тепадан тушган” ва барчаси жуда тез ҳал бўлган. Аммо у учун бир нарса ўзгармас: муҳим қарорлар олдидан Фергюсон билан маслаҳатлашиш — худди клуб анъанасидек.

“Ишониш қийин, лекин ҳаммаси жуда тез бўлди. Хаёлимга келган биринчи фикр — сэр Алекс билан гаплашиш эди. Футболда қабул қиладиган барча муҳим қарорларим ҳақида унга айтиб бераман”, — дейди Флетчер.

Унинг сўзларига кўра, Фергюсоннинг маслаҳати ҳам доим бир нуқтага бориб тақалади: клуб манфаати учун ҳаракат қилиш. Флетчер ҳам айнан шу йўлни ўзининг асосий қоидаси деб билади.

Энг таъсирли жойи шундаки, Флетчер учун “Манчестер Юнайтед”ни бошқариш ҳатто энг жасур орзуларидан ҳам баланд турар экан. У бундай имконият келиши мумкинлигини тасаввур ҳам қилмаган. Балки шу сабаб у вазиятни “кутилмаганда бўлгани яхши” деб баҳолади — чунки ортиқча ўйлаб, иккиланиб қолишга вақт бўлмаган.

“Агар бу ҳақда олдиндан айтишганида, эҳтимол, мен бу имкониятни қўлдан бой берган бўлардим”, — дейди у.

Флетчернинг айтишича, у жамоа муҳитини, клуб ичкарисидаги одамларни ва ўйинчиларни яхши таниши ҳам қарорни тез қабул қилишга ёрдам берган. Яъни, у бу ерга “бегона” бўлиб келмаган — бу клубнинг нафасини, босимини, талабини ичидан ҳис қиладиган инсон.

Қисқаси, “Олд Траффорд”да янги даврнинг вақтинчалик саҳифаси очилди. Энди эса мухлислар бир нарсани кутяпти: Флетчер бу имкониятни шунчаки “ваколат” сифатида эмас, ҳақиқий шанс сифатида қандай ишлатади? Футболда баъзан энг катта тарихлар айнан кутилмаган қарорлардан бошланади.