Ираола «Ливерпул»га қарши илк очко олишни истайди

«Борнмут» бош мураббийи Андони Ираола АПЛнинг 23-тури доирасидаги «Ливерпул»га қарши учрашув олдидан журналистлар билан суҳбатлашди. Ўйин 24-январ куни 22:30 да (Тошкент вақти билан) старт олади. Бу ҳақда euro-football.ru хабар беради.

Мутахассис клубнинг янги футболчиси Алекс Тот ҳақида ҳам тўхталиб ўтди. Ираоланинг айтишича, Тот учрашувда майдонга тушишга тайёр бўлади: одатда унга мослашиш учун кўпроқ вақт бериш мумкин эди, бироқ жамоа ҳозирги вазиятда у тезда ёрдам бериши керак. Мураббий унинг феъл-атвори яхши эканини, имкони қадар тез фойда келтиришига умид қилишини таъкидлади.

Трансферлар масаласида Ираола ҳозирча Тот клубнинг ягона хариди эканини билдирди. Унинг сўзларига кўра, раҳбарият бозор устида ишламоқда ва таркибни яна кучайтириш зарурлигини тушунади, аммо бунинг учун бироз кутишга тўғри келади. Шунингдек, у «Раян» бўйича изоҳ беришдан тийилди: футболчи «Борнмут»га тегишли эмаслигини эслатди.

Мураббий жамоанинг ҳолати оғирлигини ҳам яширмади: «Борнмут» ҳужум чизиғида, айниқса қанотларда етарлича кучга эга эмаслигини қайд этди.

«Ливерпул» ҳақида гапирар экан, Ираола қизиқарли статистикани эслатди: унинг мураббийлик фаолиятида очко ола олмаган ягона рақиб айнан «Ливерпул». Икки ярим мавсумдан бери бу тўсиқ борлиги, энди натижа олишни хоҳлаши, бироқ буни амалга ошириш осон эмаслигини айтди.

Ҳозир «Борнмут» 27 очко билан турнир жадвалида 15-ўринда бормоқда. «Ливерпул» эса 36 очко жамғарган ҳолда 4-поғонани эгаллаб турибди.