Вейк-ан-Зееда сенсацияси: Абдусатторов Гукешни шок ҳолатга солди

Вейк-ан-Зееда ўтаётган нуфузли турнир доирасидаги Нодирбек Абдусатторов — Гукеш Доммаражу ўртасидаги партия турнирнинг энг кутилмаган ва муҳокамали баҳсларидан бирига айланди. Учрашув деярли бутун баҳс давомида амалдаги жаҳон чемпиони фойдасига кечаётгандек кўринар, позиция барқарор, хавфсиз ва назорат остида эди.

Гукеш ўйинни анча ишонч билан олиб борди, ҳатто деярли тўлиқ тенг позицияга чиқиб олди. Назоратгача етарли вақт ҳам бор эди, вазият эса жиддий хатар туғдирмаётгандек кўринарди. Аммо айнан шу хотиржамлик ҳал қилувчи хатога олиб келди.

36-юришда қоралар томонидан амалга оширилган 36…Лg5?? — партия тақдирини бир лаҳзада ўзгартириб юборди. Шах билан ладьяни бериш — бу даражадаги партия учун жуда қўпол ва тушунтириб бўлмас хато эди. Энг қизиғи, Нодирбек ҳали 37.Fxf6+ юришини амалга оширишга ҳам улгурмаган эди, Гукеш эса аллақачон бу хатонинг оқибати қайтариб бўлмаслигини англаб етди.

Пиёда олингач, позиция тўлиқ вайрон бўлди. Ҳимоя имкониятлари қолмади, қарши ўйин йўқолди. Шу заҳоти Гукеш таслим бўлишдан бошқа йўл қолмаганини тан олди. Бу лаҳза партиянинг энг драматик нуқтаси бўлди.

Нодирбек Абдусатторов эса бу учрашувда яна бир бор ўзининг совуққонлиги, позицияни ҳис қилиш қобилияти ва рақиб хатосини кечирмаслик хусусиятини намоён қилди. Бу ғалаба нафақат турнир жадвали учун, балки психологик жиҳатдан ҳам жуда катта аҳамиятга эга.

Вейк-ан-Зееда бугун яна бир бор шунга гувоҳ бўлдики, шахматда ҳатто энг юқори даражада ҳам бир лаҳзалик хато бутун партия тақдирини ҳал қилиб қўяди. Абдусатторов эса айнан шундай паллаларда совринли очколарни олишни яхши билади.