Жикия агенти ҳимоячининг «Антальяспор»даги келажагини ойдинлаштирди
«Антальяспор» футболчиси Георгий Жикиянинг агенти Владимир Кузьмичёв россиялик ҳимоячининг клубдаги ҳолати ва келажаги борасида изоҳ берди. Бу ҳақда euro-football.ru хабар беради.
Агентнинг сўзларига кўра, Жикиянинг аҳволи яхши ва жамоа унга ишонмоқда. Сўнгги учрашувларда у майдонга тушмагани сабаби микрояроҳат бўлгани, ҳозир эса тикланиб олгани айтилди. Кузьмичёв Жикия кейинги ўйинда яна майдонга қайтишини кутмоқда.
Аввалроқ ОАВда турк клуби «Спартак»нинг собиқ сардори билан хайрлашмоқчи экани ҳақида хабарлар тарқалган эди.
Жикия Туркия чемпионатининг жорий мавсумида 12 та учрашувда қатнашиб, 2 марта рақиблар дарвозасини ишғол қилган. Унинг «Антальяспор» билан шартномаси 2027 йил ўрталаригача амал қилади.