Бугун Индонезияда футзал бўйича Осиё кубоги бошланади

Бугундан эътиборан нафақат қитъамиз, балки бутун жаҳон футзал мухлисларининг нигоҳлари Индонезия пойтахти Жакарта шаҳрига қаратилди. 27 январдан 7 февралга қадар давом этадиган Осиё кубоги баҳслари футзал ишқибозларига ёдда қоладиган, асабни қитиқлайдиган ва жуда кўп драматик лаҳзаларни тақдим этиши аниқ.

Индонезия ҳақида қисқача айтганда, бу — дунёнинг энг улкан архипелагларидан бири. Мамлакат 17,5 мингдан ортиқ оролдан иборат бўлиб, Янги Гвинея оролининг ғарбий қисми ҳам унинг таркибига киради. Ҳудуди 1 904,6 минг квадрат километрга тенг бўлган бу диёр сўлим табиати, серқирра маданияти ва меҳмондўстлиги билан танилган. Энди эса у яна бир бор Осиё футзалининг катта саҳнасига айланмоқда.

Қайд этиш керак, Индонезия футзал бўйича Осиё кубогини иккинчи марта қабул қиляпти. Илк бор 2002 йилда қитъа чемпионати айнан шу мамлакатда ўтказилган эди. Орадан 24 йил ўтгач, Осиё футзал жамоатчилиги яна Жакартада йиғилмоқда. Бу эса мусобақанинг руҳини янада кўтариб, тарихий кайфиятни ҳис қилдириши шубҳасиз.

Мусобақани юқори даражада ўтказиш учун Жакартадаги икки йирик спорт иншооти тўлиқ тайёр ҳолатга келтирилди. Улар Осиё кубоги–2026 баҳсларининг асосий майдонларига айланади.

Биринчи арена — пойтахт марказидаги Индонезия Арена. Бу замонавий, универсал спорт мажмуаси 2023 йил 7 август куни расман фойдаланишга топширилган. 16 500 томошабинга мўлжалланган ушбу улкан иншоот катта турнирларни қабул қилиш учун жуда қулай шароитларга эга.

Иккинчи манзил — Жакарта Халқаро Володроми. Пойтахтнинг шарқий қисмида, Равамангун ҳудудида жойлашган ушбу комплекс 2018 йилги Осиё ўйинлари доирасида қурилган бўлиб, 8 500 нафар мухлисни сиғдира олади. Володромнинг атмосфераси ҳам алоҳида, у ерда ўйинлар ҳар доим шиддатли кайфиятда ўтади.

Мусобақа тақвимига кўра, Осиё кубоги–2026 да “А” ва “C” гуруҳлари учрашувлари Индонезия Аренада ўтказилади. “Б” ва “Д” гуруҳлари баҳслари эса Жакарта Халқаро Володромида ташкил этилади. Демак, Жакарта икки майдонда бир вақтнинг ўзида футзалнинг катта байрамини намоён қилади.

Энг қизиқ жиҳатлардан бири — Ўзбекистон терма жамоасининг гуруҳ босқичидаги учрашувлари. Маълум қилинишича, жамоамизнинг гуруҳдаги барча ўйинлари пойтахт марказидаги Индонезия Аренада бўлиб ўтади. Шунингдек, гуруҳ босқичининг бир пайтда старт оладиган 3-тур учрашувларида ҳам Ўзбекистон терма жамоаси айнан шу аренада майдонга тушади. Гуруҳдаги иккинчи беллашув эса Жакарта Халқаро Володромида ўтказилади.

Қисқаси, Жакартада футзал нафақат мусобақа, балки катта шоуга айланади. Энди эса барча диққат майдонда: ҳар бир гол, ҳар бир сейв, ҳар бир хато гуруҳ тақдирини ҳал қилиши мумкин. Мухлисларга эса бир нарса қолади — ёдда қоладиган кечаларга тайёр туриш.