«Фенербаҳче» собиқ футболчиси Моуриню сўзида турмади, деди

«Фенербаҳче»нинг собиқ футболчиси Линколн жамоани 2024–2025 йилларда бошқарган Жозе Моуриню билан боғлиқ норозилигини очиқ билдирди. Бу ҳақда euro-football.ru хабар беради.

Линколннинг айтишича, португалиялик мутахассис унга берган ваъдасини бажармаган ва футболчига нисбатан ҳурматсизлик қилган. «У кўп ютуқларга эришганини ҳеч ким инкор этмайди, лекин мен учун ҳаётда характер совринлардан муҳимроқ. Моуриню мени ҳайратда қолдирди», деди у.

Футболчи «Халл Сити»га ижара асосида кетишидан олдин Моуриню билан гаплашганини, мураббий эса уни ёзги йиғинда Португалияда кўришни исташини айтганини таъкидлади. Мавсум якунлангач, у чақирув кутган, бироқ Моуриню билан боғланишга уринганда мураббий суҳбатдан бош тортиб, спорт директорига мурожаат қилишни айтган.

Линколннинг сўзларига кўра, жамоа Португалияда бўлган пайтда у ҳам Португалияда, уйида эди, шунга қарамай, Моуриню уни Истанбулга қайтариб, алоҳида машғулот ўтказишни буюрган. «Менга нисбатан адолатсиз ва ҳурматсиз муносабат бўлди», деди футболчи Fanatik нашрига берган интервьюсида.

Шунингдек, у клубга кўп ўйинларда, ҳатто ўз позициясида бўлмаганида ҳам, максимал ёрдам беришга ҳаракат қилганини, оғир жароҳат даврида эса етарли даражада қўллаб-қувватлов сезмаганини қўшиб ўтди.

Ҳозирда Жозе Моуриню «Бенфика»ни бошқармоқда.