2030 йилги мундиал финали Испанияда ўтказилиши мумкин

2030 йилги футбол бўйича жаҳон чемпионати финалини Испания қабул қилиши кутилмоқда. BBC хабарига кўра, бу ҳақда мамлакат футбол федерацияси президенти Рафаэл Лузан маълум қилган. Бу ҳақда euro-football.ru хабар беради.

Турнирни Испания, Португалия ва Марокаш ҳамкорликда ўтказади. Мусобақанинг илк уч учрашуви эса мундиалнинг 100 йиллиги муносабати билан Уругвай, Аргентина ва Парагвайда бўлиб ўтади.

Лузаннинг айтишича, Испания йиллар давомида йирик мусобақаларни юқори савияда ташкиллаштира олишини исботлаб келган ва 2030 йилги мундиалда етакчи ролни ўйнайди. У финал айнан шу мамлакатда ўтишини таъкидлаган, бироқ қайси стадион танлангани ҳақида маълумот бермаган.

Аввалроқ Марокаш томони финални Касабланкадаги “Гранд Стад Ҳасан II” стадионида ўтказишни истаганини билдирган эди. Ушбу арена 2028 йилда битказилиши режалаштирилмоқда ва 115 минг томошабинга мўлжалланиши айтилаётган. FIFA эса ҳал қилувчи ўйин қаерда бўлиши юзасидан ҳозирча изоҳ бермаган.