"Насаф" Туланинг "Арсенал" клубини мағлуб этди: Абдихолиқовдан гол...
Қаршининг “Насаф” жамоаси Анталиядаги ўқув-машғулот йиғини доирасида Россия Миллий футбол лигаси вакили — “Арсенал” Тула билан тўқнаш келди. Учрашув жуда интизомли, “қаттиқ” ва тактик жиҳатдан анча сақланган руҳда ўтди. Лекин футболда баъзан битта аниқ зарба ҳаммасини ҳал қилади — бу сафар ҳам шундай бўлди.
Баҳс тақдирини ягона гол ҳал қилди. Ҳужумчи Бобир Абдихолиқов 17-дақиқада рақиб дарвозасини ишғол этиб, “аждарлар”га минимал, аммо қимматли ғалабани тақдим қилди. Голдан кейин “Насаф” ўйинни назорат қилишга ўтди: ҳимояда тартиб, марказда кураш, олдинда эса ҳар бир имкониятдан максимал фойдаланиш. “Арсенал” Тула жамоаси ҳисобни тенглаштиришга ҳаракат қилди, аммо қаршиликлар рақибга ҳал қилувчи вазият яратиб беришмади.
“Насаф” — “Арсенал” Тула 1:0
Гол: Бобир Абдихолиқов (17)
Майдонда қатнашганлар
“Насаф” таркибида қуйидаги футболчилар майдонга тушди: Абдувоҳид Неъматов, Ғолиб Ғайбуллаев (Дилшод Муртозаев), Мурод Раҳматов (Баҳодир Ҳалилов), Аденис Шала (Даврон Усмонов), Бобир Абдихолиқов (Акрам Комилов), Шароф Муҳитдинов (Юсуф Отубанжо), Ойбек Рустамов, Яшнар Бердираҳмонов (Кингсли Сокари), Қувонч Хушвақтов, Диёр Абдуназаров, Умар Эшмуродов.
Захирада эса Асилбек Нўмонов, Машҳур Абдисолиев, Асадбек Рамилов, Жавоҳир Убайдуллаев, Зафар Садуллаев, Беҳрўз Ҳайдаров қолди.
Туркия йиғини якунланди, навбат — расмий баҳсга
Шу билан “Насаф” Туркиядаги йиғинини расман тугатди. Жамоа йиғин давомида жами 8 та ўртоқлик учрашуви ўтказди ва эртага Ўзбекистонга қайтиши режалаштирилган. Энди эътибор тўлиқ расмий ўйинга қаратилмоқда.
Бердиев бошчилигидаги “аждарлар” 9 февраль куни Элит ОЧЛ доирасида Ироқнинг “Ал Шорта” жамоасига қарши майдонга тушади. Учрашув Фарғонадаги “Истиқлол” стадионида бўлиб ўтади.
Қисқаси, йиғиннинг охирини ғалаба билан ёпиш — ҳар доим яхши белги. Энди энг муҳими: Анталияда йиғилган форма ва “тайёрлик заряди”ни 9 феврал куни ҳам майдонга олиб чиқиш. Мухлислар эса одатдагидек тайёр: “Насаф” расмий ўйинда ҳам шу кайфиятни давом эттира олсин.