Икки ўзбек ҳал қилди: "Башакшеҳир" уйига 3 очко билан қайтди (видео)

Туркия Суперлигасининг 21-турида "Башакшеҳир" сафарда "Эюпспор"ни 2:1 ҳисобида енгди. Учрашув Эйюп стадионида бўлиб ўтди.

Бу баҳс биз учун алоҳида қизиқ бўлди: Ўзбекистон миллий жамоасининг икки вакили — Аббосбек Файзуллаев ва Элдор Шомуродов асосий таркибда майдонга тушди. Файзуллаев 65 дақиқа ҳаракат қилди, Шомуродов эса ўйинни охиригача олиб борди.

Ҳисоб 14-дақиқада очилди: Давие Зелке гол урди, ассист эса Файзуллаев ҳисобига ёзилди. Шу пайтдан кейин “Башакшеҳир” ўйинни “қўлида ушлаб турди” дейиш мумкин: ҳужумда ҳам, тўпсиз ҳолатда ҳам тартиб бор, қарорлар тез, орқа чизиқда эса шошилиш кам.

Иккинчи бўлимда меҳмонлар яна бир зарба берди: 53-дақиқада Шомуродов ўз имкониятидан унумли фойдаланиб, жамоасининг устунлигини 2:0 га чиқарди. Кейин “Эюпспор” охирги дақиқаларда босимни оширди ва 90+3 дақиқада Умут Бозоқ бир гол билан интрига яратди, лекин кеч бўлди — уч очко “Башакшеҳир” чемоданига жойланиб бўлган эди.

Туркия Суперлигаси. 21-тур
Эюпспор — Башакшеҳир 1:2
Голлар: Бозоқ 90+3 — Зелке 14, ШОМУРОДОВ 53.
Башакшеҳир — Шенгезер, Шаҳинер, Дуарте, Опоку, Опери (Қоратош, 65), Кемен, Гунеш, ФАЙЗУЛЛАЕВ (Брнич, 65), Ҳарит, Зелке (Йилдирим, 74), ШОМУРОДОВ.

Бу ғалаба “шаҳарликлар” учун жуда қиммат. Нури Шаҳин жамоаси 33 очко билан 6-ўринда бормоқда, “Эюпспор” эса 18 очко билан 15-поғонада қолди. Олдиндаги турларда “Башакшеҳир” юқори ўринлар учун курашни янада қаттиқлаштира олади — бунда Шомуродовнинг голлари ва Файзуллаевнинг яратиб бериши ҳал қилувчи “витамин” бўлиб турибди. Ҳа, рақиблар ҳам била бошлади: бу иккиси кайфиятга қараб эмас, натижага қараб ўйнайди.