«Бока Хуниорс» спорт директори лавозимига Марсело Делгадо тайинланди

Аргентина гранди «Бока Хуниорс» клуб бошқарувида муҳим ўзгариш бўлди: жамоанинг янги спорт директори сифатида Марсело Делгадо иш бошлади. У клуб президенти Хуан Рикелме билан яқин ҳамкорликда ишлайди. Бу ҳақда euro-football.ru хабар беради.

Клуб таркибни тез фурсатда кучайтиришга муҳтож. Шу сабаб Делгадо ва Рикелме тандеми трансферлар ҳамда жамоани мустаҳкамлаш бўйича яқин кунларда фаол иш олиб бориши кутилмоқда.

Делгадо футболчи сифатида ҳам катта тажрибага эга: у Аргентина терма жамоаси сафида 1995–2002 йилларда 18 учрашув ўтказган ва 1998 йилги жаҳон чемпионатида ҳам қатнашган.

Шунингдек, 2003 йилда у Либертадорес кубогининг энг яхши тўпурари бўлган. Делгадо бу совринни «Сантос» ҳужумчиси, бразилиялик Рикардо Оливейра билан биргаликда қўлга киритган.