Месси Lego’дан жаҳон чемпионати кубогини йиғди
Аргентина терма жамоаси юлдузи Лионел Месси ижтимоий тармоқларда Lego конструктори ёрдамида жаҳон чемпионати кубоги макетини йиғиб чиққанини кўрсатди. Бу ҳақда euro-football.ru хабар беради.
Футболчи суратлар остида “Биз буни якунладик, Lego” дея фахр билан ёзди. Йиғилган модел баландлиги бўйича оригинал трофейга мос бўлиб, у 2842 та деталдан иборат экани қайд этилди.
Кўриниб турибдики, бундай мураккаб конструкцияни йиғиш анча вақт талаб қилади. Эслатиб ўтамиз, Аргентина ҳозирда амалдаги жаҳон чемпиони: сўнгги мундиал финалида “албиселесте” Франция билан 3:3 ҳисобидаги дурангдан кейин пенальтилар сериясида ғалаба қозонган.