Елагин Роналду бойкотдан сўнг қайтди ва гол урди

Саудия Арабистони чемпионатининг 22-турида «Ал-Наср» сафардa «Ал-Фатех»ни 2:0 ҳисобида мағлуб этди. Учрашувдаги голлардан бирига 41 ёшли ҳужумчи Криштиану Роналду муаллифлик қилди — у майдонга бойкотдан кейин қайтганди. Бу ҳақда euro-football.ru хабар беради.

Футбол шарҳловчиси Александр Елагин португалиялик юлдузнинг бу ўйиндаги ҳаракатларини алоҳида таъкидлади.

«Буюк футболчи бойкотдан кейин қайтди ва гол урди! Фақат гол билан чекланмай, ҳимояда ҳам ишлади — бир неча бор жарима майдончасидан тўпни узоқлаштирди. Гўё ёш боладек югуради! Ҳам қойил қоламан, ҳам ҳавас қиламан», — деб ёзди Елагин ижтимоий тармоқларда.

Жорий мавсумда Роналду Саудия Арабистони чемпионатида 19 та учрашувда 18 та гол урди.