Мартинес Роналдунинг роли ўзгарганини таъкидлади

Португалия терма жамоаси бош мураббийи Роберто Мартинес ҳужумчи Криштиану Роналду ҳақида фикр билдирди. Бу ҳақда euro-football.ru хабар беради.

Мутахассиснинг айтишича, у терма жамоага келганидан бери Роналду ўзини намунавий футболчи сифатида кўрсатиб келмоқда: сардор сифатида жамоага ўрнак бўляпти. Мартинес Роналду футболчилик томондан аввалгидек эмаслигини ҳам қўшимча қилди — хусусан, у “Манчестер Юнайтед”даги илк давридагидек қанот ҳужумчиси эмас. Мураббий фикрича, Роналду “тўққизлик” ролида қатъий позицион интизом талаб қилинадиган ўйинчи ҳам эмас, у кўпроқ якунловчи, яъни ҳужумларни гол билан тугатадиган футболчи.

Қайд этилишича, яқин ёзда Португалия терма жамоаси жаҳон чемпионатида иштирок этади. Мусобақа уч давлат — АҚШ, Канада ва Мексикада ўтказилади.